شۆخان

شۆخان کاتێک لە سکی دایکیدا بووە، دایک و باوکی لەیەک جیا بوونەتەوە. دوای لەدایکبوونی دەدرێتە دایکی باوکی. دایک و باوکی دووبارە هاوسەرگیرییان کردووەتەوە و ژیانی خۆیان هەیە. ئەو لەلای دایەگەورە پیرەکەی دەژی و چونکە هاوسەرگیری دایک و باوکی فەرمی نەبووە و بەڵگەی نەبوو، بە پێی یاساکانی وڵاتی عێراق، ناسنامەی نییە و هیچ کات نەرۆشتووەتە قوتابخانە. لە کاتی مێرمنداڵی شۆخاندا، دایە گەورەی دەمرێت و پورەکانی ناچاری دەکەن هاوسەرگیری لەگەڵ پیاوێکی تەمەن چل ساڵدا بکات. لەبەر ئەوەی کە شۆخان ناسنامەی نەبووە هاوسەرگیرییەکی لە دادگا بە فەرمی نابێت. شۆخان کچێک و کوڕێکی هەیە. منداڵەکانیشی هەر وەک دایکیان ناسنامەیان نییە و ناتوانن بخوێنن. شۆخان سی و پێنج ساڵە، کچەکەی یانزدە ساڵ و کوڕەکەی هەشت ساڵانە. شۆخان چەند جار هەوڵی خۆسووتاندنی داوە. ساڵی ڕابردوو لە رێگای پارێزەرێکەوە کە لەبواری خێرخوازی ژنانی کورد کەسێکی چالاکە، ئیشێکی زۆری یاسایی و دادیی بۆ کراوە هەتا شۆخان و منداڵەکانی بتوانن ناسنامەیان هەبێت. لە ئێستادا منداڵەکانی شۆخان ناسنامەیان هەیە و لە قوتابخانە ناویان نووسراوە. بەڵام شۆخان هەنووکەش لەمەڕ کێشەکانی ژیان و هەلومەرجی ئێستایدا بێ چارەیە و کەسێکی بەرکەوتووە. شۆخان سەردانی نەخۆشخانەی دەروونی و ڕۆحی کردووە و گوتوویەتی بەم زووانە تووشی هێرشی دەروونی دەبێت. بەرپرسانی نەخۆشخانە وەک نەخۆشێک وەریان نەگرتووە چونکە بەڵگەی پزیشکی تایبەتی نیە. لە دەرەوەی نەخۆشخانەکە وەستاوە و دەڵێت ئەمڕۆ هەر بیرم لەوە دەکردوە دیسانەکە بە نەوت خۆم بسووتێنم. ئەو وەرناگیردرێت و دوای وەستانێکی زۆر لە گەرمای مانگی حوزەیرانی عێراق دەگەڕێتەوە ماڵەوە.
تکیە (شارۆچکەیەک لە نزیکەی سلێمانی)، هەرێمی کوردستانی عێراق