عەیدی خەلەف موراد

عەیدی خەلەف موراد بیست و دوو ساڵ تەمەنی هەیە. ئەو لە ئاوارە سوریەکانە وا لە کەمپی پەنابەرانی UN لە دهۆک لەگەڵ بنەماڵەکەی دەژی. بە هۆی شەڕ و هێرشی داعش بۆ سەر سوریا بنەماڵەکەی لە هەلومەرجێکی زۆر ناخۆشدا بوون و بە دەستی بەتاڵ سوریایان بە جێهێشت بوو و بە پێ بەرەو عێراق و هەرێمی کوردستان هاتبوون. دایکی عەیدی خەلەف دەڵێت عەیدی لەم هەلومەرجە ناڕازی بوو و تووشی نەخۆشی دەرونی بووبوو. لە خێمەکانی UN ژیان زۆر سنووردارە. ئەوان خێمەکەیان بۆ چەند بەش دابەش کردووە. بەشێکی وەک هۆڵ، بەشێکی چێشتخانە، بەشێکی تەوالێت و بەشێکیش گەرماو. عەیدی خەلەف لەناو گەرماوەکەدا خۆی سووتاند. دەنگی هاواری بەرز دەبێتەوە و بەشێکی خێمەکە دەسووتێت. بنەماڵە و ئەو کەسانەی کە لە کەمپەکە بوون زوو ئاگادار دەبن، ئاگرکە دەکوژێننەوە و دەیگەیێنە نەخۆشخانە. ئەو لە مەرگ ڕزگاری دەبێت، بەڵام لەسەر لەش و ڕوخساری ئاسەوارێکی زۆری سووتان ماوەتەوە. تێچووی دەرمانەکەی زۆرە و بنەماڵەکە بە هۆی ئەوەی کە ئاوارەن ناتوانن تێچووی دەرمانەکەی دابین بکەن.
دهۆک، هەرێمی کوردستانی عێراق