ئەسماهان

سۆهەیلا خوشکێکی گەورەتر و خوشکێکی بچووكتر لە خۆی هەیە و برایەک کە کەم‌ئەندامی مێشکە. خوشکە گەورەکەیان بە ناوی نەجاح ساڵانی ڕابردوو بە هۆی کێشەی خێزانییەوە و خەمی براکەی لە چێشتخانەی ماڵەکەیاندا خۆی ئاگر دەدات و بە هۆی ڕێژەی زۆری سووتانەوە هەر لەو کاتەدا گیان لەدەست دەدات. ئەسماهان خوشکە بچوکەکە ڕووداوی خۆسووتاندنی نەجاح دەبینێت. ئەسماهان زۆر هۆگری نەجاح بووە و زۆری خۆشویستووە. ئەسماهان لەدوای مەرگی ئەو، زۆر گۆشەگیر دەبێت و هەتا ماوەیەکی زۆر قسە لەگەڵ کەس ناکات. کاتێک کە ئەسماهان گەورە دەبێت هەر لەو چێشتخانەیە و هەر لەو شوێنەی کە نەجاح خۆی لێ سووتاندووە، ئاگر لە جەستەی خۆی بەردەدات. بەڵام ئەمجارە سۆهەیلا زوو ئاگادار دەبێت و بە فریای خوشکەکەی دەکەوێت. قاچەکانی ئەسماهان دەسووتێن. سۆهەیلا زۆر دڵنیگەرانی خوشک و براکەیەتی. لەناو ماڵەکەدا هیچ شتێک سەبارەت بە نەجاح باس ناکرێت، بەڵام ئەسماهان وێنەیەکی نەجاحی هەڵگرتووە و بە خەتی خۆی لە پشت وێنەکە ناوی ئەوی نووسیوەتەوە. دایکی سۆهەیلا چەند ساڵ لەمەوبەر مردووە و وێڕای ئەوەی کە باوکی ژنی هێناوەتەوە، بەڵام بەرپرسیارییەتی خوشک و براکەی لەسەر شانی سۆهەیلایە.
درباسیە، رۆژئاوا، سوریا